وقف مؤقت لإطلاق الكراهية

وقف مؤقت لإطلاق الكراهية
متل هالأيامات من تلت سنين كان تقريبا نفس البرد ... لاء اكتر شوي كان تلج

وكانت الغصة بحلقنا والدموع ما تفارقنا ونحنا عم نتخيل شو ممكن يصير معاها هنيك ورا السور العالي تبع فرغ فلسطين

هنيك وقت رحنا انا واختي وبعض امهات المعتقلات ووقفنا ع الباب قلنا يمكن نقدر نخاطب انسان او نقدر نوصل لمعلومة عن صبيتنا الحلوة يلي ما قدرنا نعرف عنها اي شي ....

ويادوب وبعد دفع مبلغ يعتبر مرتب قدرنا نتاكد انها بفرع فلسطين

كنت كل ما مر من هونيك طلع ع بنايتو العالية يلي طاير منها حيطان بعد تفجير القزاز واسأل حالي ياترى انت وين يا حلوتي بايا قبو ؟؟ وشو صاير فيكي ؟؟

كنت اتمنى المحها او شوفا لو من بعيد ... كنت متمنية اطمن انها منيحة .... اخ شو تمنيت احميها من الوجع والخوف وولاد الحرام يلي بدها تشوفن هونيك

الخوف  عليها يلي تملكنا وسيطر ع تفكيرنا وقتا خلانا نكفر بكل شي كأن قبل وقت كانت تطلع مظاهرات او توزع منشورات او تمارس نشاطاتا الثورية -كان لعب ولاد صغار- وهلئ بس فقنا وصحينا وجد الجد ....

قلة فهمنا وقتا ومصيبتنا الكبيرة حسستنا انو ياترى الحرية مستاهلة هالتمن الغالي يلي دفعتو حلوتي فيها ؟؟؟

ولا كان تصرفها اندفاعي او ردة فعل

ياترى هيه كانت مآمنة بالحرية لدرجة انها تعتقل وتتعزب وهي يلي بعمرها ما اخدت ملاحظة او تنبيه لأنها من صغرها بتفهم من النظرة

الحيرة كانت قاتلتنا والوقت حرق قلوبنا والشتاء والتلج من يومها صارت عيلتنا كلها بتكرهو

مافيني احكي تفاصيل غيابا كتير ....لأن لهلئ وقت بتزكر شوكان شعوري وقت شوف تختها فاضي او تيابا لسا ع العليقة ... لهلئ بحس بنفس الغصة وبيدمع عيوني

واجا يوم طلعة بطلتنا من معتقلها

بيوم كان التلج فيه مغطي كل وسخ الدنية والمفروض كانت الدنية ترجع حلوة بعيونا وبطلتنا ح تطلع أخيرا وتخلص من العذاب يلي كانت فيه

لما رحت جنب الفرع مع اختي كانو الناس كلها واقفة متل يوم الحشر بتطلع ع مد عينك وملات الساحة ناس واقفة وحاملة شماسي والتلج عم يندف من دينو وكل ما يطلع معتقل يركدو اهلو لعندو يرحبو فيه ويعانقو حتى الناس الغربا عنو تقلو الحمد لله السلامة كمان وتطمن عليه وتسئلو اذا بتعرف فلان ؟ او شفت علان ؟

يوما وقفنا كتير والبرد حرق عضامنا كنا آخدين معنا جاكيت لأن بنت الدلال اعتقلت بأوائل الشتي وتيابا خفيفة

البرد حرق عضامنا لدرجة انن لما قالولنا تعو بكرا ركدنا ع بيوتنا من كتر التعب وحرق الدم كأن ما كفاهن ذل ولادنا كمان حبوا يذلوا فينا ويدفشونا يوم تاني

رجعنا والحرقة بقلبنا والدمعة واقفة بعيونا لا راضية تنزل وتريحنا ولا راضية تروح وهيه رضيانة ومقتنعة انو بكرة حلوتنا طالعة

وطلعت الحلوة كانت فرحانة وعم تضحك لسا خفت دمها موجودة وثقتا بربها وثورتها احسن مننا كلنا

ما طلعت ناقمة ع الثورة ولا معصبة ولا ضعيفة رغم النحف والوجع يلي شافتو

يومها وهي بالسيارة

قلنالا ستك ما خلتنا ناكول ملوخية منوب

قالت مافي تاكلو طالما هيه ما عم تاكول .وهلئ عملتلك ياها ...بقا تم الإفراج عنك وعن الملوخية بيوم واحد

قالت لعبتو بالتلج ؟

- انو تلج وانت بهالحالة ليش النا قلب

_بس نحنا لعبنا

_شلون لعبتو ؟

_ كان عنا واحد متخلف بيضرب وبعزب هالشباب المعتقلة بدون اي رحمة او تفكير كان لما بيمشي بالكوردور نعرفو قبل ما نسمع صوتو لأن الو صوت نفس وبيمشي ع الأرض كانو عم يجر شي بيتحرك متل خنزير بري .... يومها سمعنا صوتو كان عم يضحك ومروء بالتلج وكنا عم نشوف التلج من الشباك ونقول بقلبنا ياترى حنشوفو ونمسكو بايدنا كنا عم نطلع ببعضنا ونتحسر وصرخت وحدة فينا ياربي بدي العب بالتلج .... بدي العب بالتلج اي ؟؟؟ اي ياربي .....

وقتا نحنا وربنا وشنا ودرناه ورجعنا نطلع ع الشباك ونحلم وفجأة الخنزير البري فات حامل طابة تلج كبيرة كتير وقلنا خدو بردو يا ..... زت طابة التلج على بطانياتنا يلي هيه اصلا باردة من الأرض ونطينا كلنا نضب البطانيات مشان ما ينبلو .....

_اي وشو صار .... الله لا يوفقوا

_ لعبنا بالتلج وضحكنا يوما لقلنا حاجة

_ لأن لعبتو بالتلج ؟!

_أي .. ولأن الله قلنا انا معكون حتى وقت بدكن تلعبو

التعليقات (1)

    اسحق احمد

    ·منذ 8 سنوات شهر
    في ضوء الأحداث في سورية لا بد من تحالف عربي إسلامي قوي متين يستطيع أن يواجه التحدي الكبير و الهجمة الشرسة التي تستهدف تمزيق سو يا والعالم العربي والعالم الإسلامي ولا من استمداد القوة من الله تعالى وبذلك يتم النصر بإذن الله تعالى
1

الأكثر قراءة

💡 أهم المواضيع

✨ أهم التصنيفات