فنانة موالية تهاجم مؤيدي أسد: استحوا

شنت الفنانة الموالية لنظام أسد، تولين البكري، هجوماً على مؤيدي الأخير، عقب وصفهم للخارجين بكثرة في الشوارع بعد حظر بـ"القطيع" واستهزأت منهم بالقول: خليكم بمدينتكم الفاضلة!

وقالت البكري عبر حسابها الرسمي في فيسبوك: "كلمتين واللي بده يزعل يزعل.. هي الناس اللي نازلة طج بوستات عن القطيع اللي فلت بالشوارع اليوم بحب قلهم خليكم بمدينتكم الفاضلة واتركوا الناس بهمها".

وأضافت  "هي الناس اللي نزلت اليوم صرلها شهر محجورة ببيتها بدون شغل وبدون دخل وبدون ما حدا يقلها شو لازمك" فيما يبدو انتقاداً مبطن لنظام أسد.

وأوضحت البكري "ما نزل( هالقطيع) ليتسيرن ولا نزل وخاطر بصحته لأنه جاهل... نزل لأنه مجبور... نزل لأنه سمّان حارتهم صار بده يجمع ملايين من الحجر.. نزل ليشتري طبخة من سوق الهال أرخص بمئة ليرة ليوفرها لأولاده.... أو نزل ليدور على رزقة يطعمي ولاده منها".

واستطردت "لما كيلو الليمون بيصير سعره 2500 ليرة لا تسأل ليش نزل (القطيع) عالشارع... لما كيلو اللحمة سعره 12000 وكيلو الدجاج 2500 والزيت والسمنة والسكر والرز والبرغل والبصل بحلقوا للسما لا تسأل ليش نزل (القطيع) عالشارع... هي الناس مافيها تاكل بسكويت... هي الناس بدها تاكل خبز من خبز الحكومة ولو مفتفت مو محبة فيه بس لأنه حق الربطة 50 ليرة.. حلوا عن كتف هالناس وارحموها شوي".

وختمت "لكل حدا بيوصف هالناس بكلمة (قطيع) بحب قله كلمتين... هاد القطيع هو أهلك وناسك وأولاد بلدك اللي بلاهم أنت مابتسوى حق الكهربا اللي صرفتها عالنت وأنت عم تتفزلك بمنشورك.. استحوا ولوووووووووو".